سبا کابل د پاکستاني پلاوي کوربه دی
- 8 مياشتي دمخه (24/03/2024)
- سمسور نیوز
- 314
ټاکل شوې، چې سبا دوشنبه د پاکستان د سوداګرۍ مرستیال وزیر په مشرۍ یو لوړپوړی پلاوی کابل ته راشي.
د راپورونو له مخې، په دې سفر کې به پر یو شمېر اقتصادي او ترانزېټي مسائلو خبرې وشي.
پاکستاني رسنیو دا سفر د پاکستان او افغانستان ترمنځ مهم بللی او لیکلي یې دي، چې ښایي یو شمېر لویې اقتصادي پرېکړې په کې وشي.
بل لورته د پاکستان د بهرنیو چارو وزارت هم کابل ته د پاکستاني پلاوي راتګ تائید کړی دی.
د یاد وزارت ویاندې ممتاز زهرا بلوڅ ویلي، چې په دغه دوه ورځني سفر کې به د دواړو هېوادونو ترمنځ پر اقتصادي مسائلو بحث وشي.
نوموړې زیاته کړې، چې پاکستان لاهم له افغانستان سره سوداګرۍ او د خلکو ترمنځ اړیکو ته ژمن دی.
پاکستانی پلاوی داسې مهال کابل ته په سفر راځي، چې په وروستیو کې افغانستان پر کراچۍ بندر تکیه کمه او د ایران چابهار بندر ته مخه کړې.