هندي او روسي استازي د افغانستان پر روان وضعیت غږېدلي
- 5 مياشتي دمخه (16/05/2024)
- سمسور نیوز
- 432
د افغانستان لپاره د هند او روسیې ځانګړو استازو په نوي ډیلي کې د افغانستان د اوسني وضعیت په اړه خبرې کړې دي.
د هند له بهرنیو چارو وزارت څخه په خپره شوې خبرپاڼه کې راغلي، چې په دې لیدنه کې دواړو لوریو د افغانانو د ملاتړ لپاره د پراختیايي مرستو پر اړتیا خبرې کړې دي.
د سرچینې د مالوماتو له مخې، جي پي سېنګ او ضمیر کابلوف ټینګار کړی، چې په اوسني وضعیت کې اړتیا ده ترڅو له افغانستان سره پراختیايي مرستې وشي.
ورته مهال په کابل کې د روسیې سفارت هم د دغې لیدنې خبر ورکړی دی.
یاد سفارت پر خپله اېکس پاڼه لیکلي، چې دواړو لوریو له افغانستان سره د پراختیایي مرستو پر اهمیت ټینګار کړی دی.
دغه هندي او روسي استازي داسې مهال د افغانستان په تړاو لیده کاته کوي، چې ټاکل شوې د افغانستان په اړه د ملګرو ملتونو په کوربه توب د دوحې درېیمه غونډه راتلونکې میاشت په قطر کې جوړه شي.