سمسور

ایران کې یو افغان اعدام شوی

• 1 مياشت دمخه (17/11/2024)
• شریف الله وليزاد
• 19

د ایران د بشري حقونو سازمان په یوه راپور کې د ایران لخوا د یوه افغان د اعدام خبر ورکړی دی. 

دغه سازمان تېره ورځ په یوه بیان کې لېکلي، چې د خالد تاجک په نوم دا کس د یاد هېواد د قزل حصار په زندان کې په دار ځړول شوی دی. 

په بیان کې راغلي، چې تاجک د قصدي وژنې په تور تېره چهارشنبه اعدام شوی دی. 

دا خبر داسي مهال نشر شوی، چې د ایران لخوا په روان ۲۰۲۴ زېږدیز کال کې د بېلابېلو جرمونو په تورونو د دغه کس په ګډون ۵۵ تنه افغانان اعدام شوي او تازه د یاد هېواد یو پلاوی هم افغانستان ته راغلی؛ ترڅو په راتلونکو دوو میاشتو کې ۱۰۰۰ تنه افغان بندیان سرپرست حکومت ته وسپاري او د بند پاتې موده افغانستان کې بشپړه کړي.