2020-09-21
نه تیاره یم نه رڼا یم راشه وګوره جانانه
بس هم هغه شانته ستا یم راشه وکوره جانانه
زه چې کوم طرف ته ګورم بس هم ته یې بس هم ته یې
بس هم تا ته په خندا یم راشه وګوره جانانه
آینې خو په دروغو باندې سر دي لیونۍ دي
ستا د مخ غوندې رښتیا یم راشه وګوره جانانه
زه خو بی له تا د بل چا په امکان هم نه پوهیږم
خلک واي د بل چا یم راشه وګوره جانانه
بس یو ځل یې هسې ووی درنه لاړمه سعوده
لا تر اوسه په ژړا یم راشه وګوره جانانه