چې میاشته نوې شوه سپوږمۍ کې دروغجنه شولې
خپلې سیالۍ سره سیالۍکې دروغجنه شولې
سترګې دې ټیټې کړې زما پلو دې و نه کتل
زما د نیشت په ګواهۍ کې دروغجنه شولې
راتلونکو سترګو ته دې سپاري یوویشتمه پیړۍ
څه به کوې که ازادۍ کې دروغجنه شولې
هغه د امن په دعوو کې دې سرونه پرې شول
ناځوانې مینې په نړۍ کې دروغجنه شولې
مصرع پرې ښکلې شوه چې ګل دې راته وویل خو
ته هم اخر په شاعرۍ کې دروغجنه شولې
بی زندګۍ وې او هغې ته به دې ژوند ویلو
سعوده نن په زندګۍ کې دروغجنه شولې