دا د لمبو شاته ولاړه جینۍ
2020-09-21
دا د لمبو شا ته ولاړه جینۍ
غزل هم لیکي او پخلی هم کوي
اور د رڼا نڅاګري زده کړې
شغلې یې ناڅي او لوګی هم کوي
د تمبو مخې ته پرده زوړنده
او په کوڅه کې ماشومان په جنګ دي
نن په راډیو کې تبصرې کیدلې
چا سره بیا خپل ګاونډیان په جنګ دي
ناڅاپه مور په جینۍ غږ وکړلو
پخلي نه پسته بیا جامې ووینځه
اوس به څادر اوس به ټغر ګنده کړي
دغه ماشوم له لږې پښې ووینځه
دا سر خوړلې کتابچه دې پریګده
د دې د لاسه دې دنیا هیره وي
کله دې مالګه په ډوډۍ کې نه وي
کله کټوۍ کې مصالحه ډیره وي
دا د لمبو شاته ولاړه جینۍ
غزل هم لیګي او پخلی هم کوي
د اور لمبو نه هم مخ نه اړوي
او خپلې مور ته سپیناوی هم کوي
واي زما په کتابچه کې څه دي
بس خو امید او انتظار د سبا
بریږده چې اوښکې امیلونه کړمه
سترګې به و پییم په تار د سبا
بیا به زما پرده کې پټې هیلې
د دې لمبو غوندې سپرغۍ وساتي
بیا به د خپل وجود اعلان وکړمه
او دا غزل به مې ژوندۍ وساتي