2020-09-21
اوس ډبرې هم غواړي چې ژوند ولري
زه ترې بوت سازوم خو ایمان رانه ځي
دا مشین، دا روبوټ مصنوعي بنیادم
دی راځي او چې راشي نو ځان رانه ځي
هغه لات او منات خو په هیڅ کې نه وو
روبوټان خو نه مرګ او نه خوب پیژني
هغوی ځان نه یو مچ هم شړلی نشو
دوی خو ستا او زما لیونتوب پیژني
تیره ورځ یو هیواد تذکره ورکړله!!
او زما په وطن کې چاودنې کیدې
دوی له اوسپنې ځانله سړي سازول
او زما په سړو ځان وژنې کیدې
روبوټان لا زمونږ غوندې ځان لټوي
دې نه پس به مونږ دوی ته جذبات ورکوو
یعني دوی ته به خپل احساسات ورکوو
او آخر کې به ټول اختیارات ورکوو
لکه اوس چې په سترګو کې لینز نصبوو
لکه اوس چې په زړه کې مونږ وال اچوو
بیا به داسې د سر په کاسه کې هم مونږ
یو دماغ هم د دوی په مثال اچوو
بیا به مونږه هم دغسې شو لکه دوی
پښتانه روبوټان ازبکان روبوټان
او بیا دوی به هم دغسې شي لکه مونږ
بدکاران روبوټان او نیکان روبوټان