سمسور

بایډن د سرتېرو د پاتې کېدو په لټه کې دی

• 3 کاله دمخه (25/03/2021)
• نګینه ارشاد
• 2086

 د امریکا د کانګرس د وسله والو خدمتونو د کمیټې مشر ادم سمت ویلي، چې په شپږو اوونیو کې د امریکايي ځواکونو وتل له امکانه لرې دي او بایډن غواړي، چې په افغانستان کې د خپلو سرتېرو ماموریت ته دوام ورکړي.

نوموړي ویلي، چې د امریکا د حکومت لومړنۍ دنده دا ده، ترڅو له طالبانو سره افغانستان کې د امریکا په مشرۍ د بهرنیو ځواکونو د پاتې کېدو په اړه خبرې وکړي.

باید یاده شي، چې تر دې وړاندې هم امریکايي چارواکو ویلي وو، چې د دوحې د تړون له مخې به د امریکايي ځواکونو وتل د امریکا لپاره ستونزې راپورته کړي.

امریکا طالبان په خپلو کړیو ژمنو کې پاتې ګڼي او وايي، چې لاهم یاده ډله له القاعده او نورو بهرنیو ترهګرو سره اړیکې لرې.

په ورته مهال بیا تېره ورځ د ناټو غړیو هېوادونو په غونډه کې د یاد سازمان مشر، ینس سټولنټبرګ هم ویلي و، چې ناټو به له افغانستان سره خپلو هر ډول مرستو ته دوام ورکوي.