اروپایي ټولنې پر ټولشموله حکومت ټینګار کړی
- 2 کاله دمخه (26/10/2022)
- سمیر احمد
- 831
سمسور نیوز (۴لړم۱۴۰۱) د افغانستان په اړه د اروپايي ټولنې د پارلمان د بهرنیو اړیکو کمېټې غونډه کړې ده.
له دې کمېټې څخه په خپره شوې خبرپاڼه کې راغلي، چې په ترسره شوې ناسته کې په افغانستان کې د نجونو د ښونځیو پر پرانیستلو، د افغانستان پر اوسني وضعیت او د سیمې پر هېوادونو د دغه حالت د اغېزو په اړه بحث وشو.
د افغانستان لپاره د اروپايي ټولنې ځانګړي استازي «توماس نیکولسن» دې ناستې ته ویلي، چې د افغانستان په اړه یې د سیمې له هېوادونو سره تفصیلي خبرې کړې دي.
هغه زیاته کړې، اوس د سیمې او ډېر نور هېوادونه په افغانستان کې د پراخ بنسټه حکومت غوښتوونکي دي.
نوموړي ویلي، د افغانستان او سیمې د اوږدمهاله ثبات لپاره د بشري حقونو ساتنه او ملاتړ او د پراخ بنسټه حکومت پر لوري ګام اخیستل، د روان وضیعت د حل لاره ده.
نیکولسن دغه راز زیاته کړې، له افغانستان څخه د کډوالۍ ګواښونه د ګاونډيو هېوادونو لپاره هم د اندېښنې وړ خبره ده.
په دې غونډې کې د ملګرو ملتونو د بشري حقونو د برخې مشرې هیدر بار په افغانستان کې د نجونو د ښوونځيو او مېرمنو د حقونو په برخه کې د نړیوالې ټولنې په غبرګون نیوکه کړې.
هغې ویلي، چې اروپايي ټولنه باید په افغانستان کې د حساب ورکونې یو ځانګړی سیسټم جوړ کړي او د یاد هېواد موضوعات له نږدې وڅاري.