ترکیه: هرات کې موزیم جوړوو، اړیکې به مو لا وغوړېږي
- 11 مياشتي دمخه (27/11/2023)
- سمسور نیوز
- 416
په کابل کې د ترکیې سفیر جنګ اونال د هرات د اطلاعاتو او فرهنګ رئیس سره په لیدنه کې ژمنه کړې، چې په دغه ولایت کې یو موزیم جوړوي.
باختر د هغه له قوله ویلي، چې په دې موزیم کې به د افغانستان او ترکیې سمبولونه نندارې ته کېښودل شي.
د ښاغلي اونال په باور، چې د دغه موزیم په جوړېدو سره به د دواړو هیوادونو اړیکې لا پراخې شي.
نوموړي همداشان ژمنه کړې، چې دوی په ۲۰۲۴ کال کې په هرات کې د زېر زمیني جومات د بیارغاونې، د شهزاده تخت، د لاسي صنایعو د پراختیا، د نستعلیق کتابونو د چاپ او په هرات کې د کتابتون د بیا رغولو په برخه کې کار کوي.
د یادونې ده، چې په هرات کې وروستۍ زلزلې د يو شمېر کليو د ويجاړولو ترڅنګ، د دغه ولايت تاريخي او لرغوني ځايونه هم زيانمن کړي دي.
په دې زلزله کې د هرات لوی جومات، اختیارالدین کلا، منارونه او د دغه ولایت ځیني نور تاریخي ځایونه زیانمن شوي دي.
که څه هم سرپرست حکومت د ترکیې په ګډون لا کوم هېواد پر رسمیت نه دی پېژندلی؛ خو په وروستیو کې د دواړو هېوادونو اړیکې خوږې شوې.
ترکیې د هرات له زلزله ځپلو سره د مرستې ترڅنګ، په نورو بېلابېلو برخو کې هم له سرپرست حکومت سره خپله همکاري جاري ساتلې.