اوچا: د هرات ۲۵ زره زلزله ځپلې کورنۍ سرپناه ته اړتیا لري
- 3 اونۍ دمخه (14/10/2024)
- سمسور نیوز
- 30
د ملګرو ملتونو د بشري مرستو د همغږۍ دفتر یا اوچا وایي، د یوه کال په تېرېدو سره لاهم د هرات ۲۵ زره زلزله ځپلې کورنۍ سرپناه ته اړتیا لري.
اوچا د یکشنبې په ورځ (د تلې ۲۲مه) پر خپله اېکس پاڼه لیکلي، چې دغه سازمان د اظطراري غبرګون له مرکزي صندوق سره په تېر یوه کال کې د هرات له ۲۷۵ زره زلزله ځپلیو کسانو سره مرسته شوې ده.
په دغو مرستو کې سرپناه، خوراکي توکي، روغتيايي خدمتونه او زده کړې شاملې دي.
اوچا په هرات کې د تېر کال زلزله ځپلیو د اړتیاوو د پوره کولو لپاره د لا زیاتو مرستو غوښتنه کړې ده.
د یادونې ده چې د تېر کال په تلې میاشت کې د ریښتر په کچه ۶،۳ درجې زلزلې د هرات ځینې برخې ولړزولې.
تر دې وړاندې افغانستان کې د ملګرو ملتونو مرستندویه پلاوي دفتر یا یوناما هم ویلي وو، چې په هرات کې له خونړۍ زلزلې یو کال وروسته لاهم زیات شمېر قربانیان بشري مرستو ته اړتیا لري.