2020-09-21
شپون یمه
یو ډانګ لرم
تر سلو زیاتې ورۍ لرم
ښکلې شان کېږدۍ لرم
سر په بیابان یمه
واسکټ لرم
خولی لرم
ښکلې شان کېږدۍ لرم
ښکلی نازولی
تور او سپین غوندې پاپي لرم
زور د مست هاتی لرم
کله چې تیاره شي
نو رمه خپله را پنډه کړم
ټوله شمېر په منډه کړم
ټوله شپه پاپي
زما رمه ساتي او څار کوي
کار د څوکیدار کوي
کله که لېوه راشي
پاپي ډېر شور ماشور کوي
منډې لور په لور کوي
زه له خوبه پاڅمه
او ډانګ په لېوه باندې کړم
پورته ترې نه ساندې کړم
بیا د لېوه سر
او یا هم ملا په ګوزار ماته شي
خونه یې میراته شي
کله چې لېوه؛
د ډانګ له واره خپله ساه ورکړي
تېره خونبها ورکړي
لمر چې کله څرک وهي
څرمن د لېوه وباسم
لمر ته یې بیا وساتم
کله چې څرمن د لېوه
لمر ته نرمچکه شي
جوړه ترې توشکه شي
بیا یې نو په شګو کې
هواره کړم آرام کوم
خوب پرې شامدام کوم
ماسره څرمنې
د لېوانو بیخې ډېرې دي
هومره چې بې شمېره دي
شپون یمه
رمه لرم
تر سلو زیاتې ورۍ لرم
ښکلې شان کېږدۍ لرم