2020-09-21
زما سر مه پرېکوه
زه هم سپین سرې یوه مور لرمه
د دوعاګانو او ښېراوو ښه ډېر زور لرمه
بس نو په خدای چې مسلمان یمه زه
په دغه خاوره زیږیدلی یمه
قسم دی ومنه افغان یمه زه
ګوره حلال مې نه کړې
زه کلیمه وایمه
د محمد رسول الله پیغمبري منمه
د آخرت په ورځ ایمان لرمه
زه هم وړوکی خاندان لرمه
نو په ایمان چې مسلمان یمه زه
په دغه خاوره زیږېدلی یم افغان یمه زه
ګوره حلال مې نه کړې
زما په تا ددغه قتل پیرزو نه ده شوې
که داسې کار دې وکړ
نو بیا خو وګڼه چې دومره تباهي دې وکړه
زما د مور د زړه له تله به ښېرا ووزي
هغه ښېراوې چې آسمان لړزوي
چې قیامت په یوه آه کې په جهان راولي
چې په لحظه کې بیا محشر جوړ شي
چې مختورن د خدای په در کې بیا ولاړ وې راته
زما په تا باندې د خپلې اروا پور پاته وي
او ته بې وسه وې له تا به دغه زور پاته وي
او زه به هم د خدای په کار کې کار لرلی نشم
په ما خو ګران یې زه به تا هم هېرولی نه شم
نو د الله په نامه روی د پیغمبر ومنه
ګوره حلال مې نه کړې
او دا چاړه دې ایسته وغورځوه