سمسور

د هوایي چلند ادارې د حکمتیار څرګندونې رد کړې

• 3 کاله دمخه (23/01/2021)
• محمد نسیم ستانکزی
• 1022

د ملکي هوایي چلند ادارې د حامد کرزي نړیوال هوایي ډګر کې د بې نښانه او بې لوګو الوتکو  الوت او ناستې په اړه د حزب اسلامي د مشر ګلبدین حکمتیار څرګندونې ناسمې بللي.

حکمتیار تیره ورځ د جمعې لمانځه پر مهال ادعا وکړه چې د کابل هوايي ډګر کې بې نوم او نښانه الوتکې الوت او ناسته کوي او په وینا یې د پيسو او سرو زرو په قاچاق کې لاس لري.

د حکمتیار په وینا ددغو الوتکو امنیت د ځانګړو ځواکونو له خوا نیول کیږي او له ولسي جرګې یې وغوښتل چې دغه موضوع وڅیړي.

خو د ملکي هوایي چلند ادارې د یوې خبرپاڼې په خپرولو سره دغه ادعا ناسمه بللې او رد کړې یې ده.

د خبرپاڼې له مخې ټولې ملکي الوتنې د ملکي هوایي چلند ادارې د مخکنۍ اجازې په اساس تر سره کیږي. 

دغې ادارې ویلي هیڅ بې نوم او نښان الوتکه د نړیوالو مقرراتو له مخې په ملکي هوایي ډګرونو کې د الوت او ناستې اجازه نه لري.