په سویډن کې یو افغان مهاجر اووه تنه ټپیان کړي دي.
- 3 کاله دمخه (04/03/2021)
- خالد سهار
- 1405
د سویډن هېواد اسمولند ایالت په جنوبي برخه ویتلاندا ښار کې تېره ورځ ماسپښین مهال یو افغان مهاجر د دغه هېواد اووه تنه په چاقو وهلي دي.
د سویډن هېواد یوې رسنۍ ویلي، چې دغه بریدګر د افغانستان مهاجر دی او په وینا یې، چې یاد کس په تېر ۲۰۱۸ کال کې دغه هېواد ته راغلی دی.
سرچینې ویلي، چې یاد برید کوونکی د پېښې پر مهال د پولیسو له لوري په ډزو کې ټپی شوی او اوسمهال په روغتون کې بستر دی.
د سویډن هېواد پولیسو یادې پېښې ته په اشارې سره ویلي، چې دغه برید کوونکي تر دې وړاندې هم ورته جرمونه ترسره کړي دي.
د سرچینې په حواله چې پولیسو همدارنګه ددې پېښې په تړاو څېړنې هم پیل کړي او د دغه کس کورته ورغلي او له شاوخوا ګاونډیانو یې د ده په تړاو پوښتنې کړې دي.
سرچینه کاږي، چې د یاد افغان مهاجر په برید کې اووه تنه ټپیان شوي، چې اوسمهال په روغتون کې بیستر دي او د درېیو نورو حالت یې نازک ښودلی دی.
باید یاده شي، چې په تېر ۲۰۱۷ کال کې هم یو ازبیک مهاجر د سویډن پلازمېنې ستاکهلم ښار په یو ګڼه ګوڼه ځای کې پر موټر ۵ تنه وهلي وو، چې له امله یې یاد شمېر کسان وژل شوي وو.
بل خوا نن د افغانستان د بهرنیو چارو وزارت په یوې خپرې کړې اعلامیې کې دغه پېښه په کلکو ټکو غندلې او مجرم ته یې د سزا ورکولو غوښتنه کړې ده.