زابل کې د ترافیکي پېښې له امله څلور کسانو خپل ژوند بایللی
- 2 کاله دمخه (22/05/2022)
- سمسور
- 687
سمسور (۱غبرګولی۱۴۰۱) زابل کې سیمه ییز چارواکي وايي، چې په دغه ولایت کې د ترافیکي پېښې له امله څلور تنه وژل شوي او دوه تنه نور ژوبل دي.
د مسوولینو په وینا، چې دغه پېښه نن یکشنبه د زابل اړوند په «هزار تک» سیمه کې د کورلا ډوله موټر او مازدا د ټکر له امله رامنځته شوې ده.
د معلوماتو په اساس د پېښې ټپیان روغتون ته لېږدول شوي دي.
دا په داسې حال کې ده، چې تېره ورځ په بدخشان ولایت کې په «خواهان» ولسوالۍ کې هم د ترافیکي پېښې له امله څلور تنه وژل شوي وو او یو تن ټپي شوی و.
په هېواد کې ډېر کله ترافیکي پېښې د موټر چلوونکو د بې احتیاطۍ او ترافیکي نښو د نشتوالي له امله رامنځته کېږي.