نامعلومو وسله والو هرات کې دوه دیني عالمان وژلي
- 1 کال دمخه (23/11/2023)
- سمسور نیوز
- 521
سیمه ییزې سرچینې وایي، په هرات ولایت کې د نامعلومو وسله والو په برید کې دوه دیني عالمان وژل شوي دي.
سرچینې وایي، پېښه نن غرمه مهال د هرات ښار په جبریل سیمه کې رامنځ ته شوې ده.
سرچینه زیاتوي، چې دغه دیني عالمان د سیدالشهداء جومات مخې ته د موټر سایکل سپرو وسله والو له لوري په ډزو سره وژل شوي دي.
سرچینې د دغو دیني عالمانو نومونه شېخ رجب اخلاقي او خادم حسین هدایتي ښودلي دي.
تر اوسه د دغې پېښې انګېزه نه ده روښانه شوې.
ځایي چارواکو هم تر اوسه په دې اړه څه نه دي ویلي.
د يادونې ده، چې په تېره يوه مياشت کې په هرات ولايت کې د هدفي او مرموزو وژنو پېښې زياتې شوې دي.
د راپورونو له مخې، په دې موده کې د هرات په انجيل ولسوالۍ کې يو ديني عالم او يو پخوانى جهادي قوماندان د ناپېژاندو وسله والو له خوا وژل شوي دي.