ترکیې په ناټو سازمان کې د سوېډن غړیتوب ومانه
- 10 مياشتي دمخه (24/01/2024)
- سمسور نیوز
- 447
ترکیې تر شل میاشتني ځنډ وروسته په ناټو سازمان کې د سوېډن غړیتوب منلی دی.
د دغه هېواد پارلمان هغه سند د رایو په اکثریت سره تصویب کړی، چې له مخې یې اوس سوېډن د ناټو غړیتوب ترلاسه کولای شي.
یاد سند لا هم د وروستي کېدو لپاره د ولسمشر رجب طیب اردوغان تاییدي لاسلیک ته اړتیا لري.
امریکا او سوېډن د دغې پرېکړې هرکلی کړی او هیله یې ښودلې، چې یاد سند به د ولسمشر اردوغان له لوري هم لاسلیک کېږي.
ترکیې تر دې وړاندې له ناټو سازمان سره د سوېډن د یو ځای کېدو مخالفت کړی و، چې ناندرۍ یې وپارولې.
اوس یوازې هنګري پاتې دی، چې تر اوسه یې په ناټو کې د سوېډن غړیتوب ته اجازه نه ده ورکړې.