شمالي وزیرستان کې د نجونو یو ښوونځی په بمونو الوځول شوی
- 7 مياشتي دمخه (10/05/2024)
- سمسور نیوز
- 314
په شمالي وزیرستان کې د عافیه په نوم د نجونو یو خصوصي ښوونځی د نامعلومو وسلهوالو له لوري په بمونو الوځول شوی دی.
د پاکستاني رسنیو د راپورونو له مخې، پېښه تېره ورځ سهار وختي د شیوا تحصیل په دره خېل کې شوې ده.
د ښوونځي مسوولینو ویلي، چې وسله والو د ښوونځي وسایل او کتابونو سوځولي او بیا یې چاودنه ورکړې.
د سرچینې د معلوماتو پر اساس، په ښوونځي کې دوه کوټې او ودانۍ په بشپړ ډول ویجاړ شوي دي.
پولیسو ویلي، چې د پېښې په اړه یې پلټنې پیل کړې او لا معلومه نه ده، چې دا کار چا کړی دی.
د یادونې ده، چې د نجونو دغه ښوونځي ته بیا، بیا د برید په اړه خبرداري ورکړل شوي وو.
دا په سیمه کې د نجونو یوازېنی ښوونځی و، چې شاوخوا ۱۲۰ تنو نجونو په کې زدهکړې کولې.