طالبان: په نږدې راتلونکي کې د نوي حکومت چوکاټ اعلانوو
- 3 کاله دمخه (21/08/2021)
- سمسور نیوز
- 1493
رويټرز خبري آژانس د طالبانو د يو مشر له قوله خبر ورکړی، چې تمه ده په نږدې راتلونکو اوونيو کې د دوی له لوري د نوي حکومت چوکاټ اعلانشي.
رويټرز نن يو ټويټ کې ليکلي، چې د طالبانو حقوقي، مذهبي او بهرني سياست کارپوهان هوډ لري، په نږدې راتلونکو څو اوونيو کې د نوي حکومت چوکاټ وړاندې کړي.
په همدې حال کې دوحه کې د سیاسي دفتر مشر ملا عبدالغني برادر یو طالب پلاوي سره یو ځای پرون ماښام له کندهار څخه پلازمېنې کابل ته راغلی؛ څو ژر له ښکېلو اړخونو سره د روان سیاسي بحران پر سر بحث وکړي.
باید وویل شي، چې تېره یکشنبه د طالبانو تحریک له یو شمېر نورو ولایتونو وروسته پر کابل هم ولکه ټینګه کړه او د ښار امنیت یې په لاس کې واخیست.
د طالبانو تر راتګ وروسته یو شمېر افغانان خپل راتلونکي او د سر خوندیتوب ته خورا اندېښمن دي.
د دوی تر راتګ وروسته دغهراز دولتي ادارې وځنډول شوې او خلک له بېسرنوشتۍ سره مخ دي، چې دې حالت د خلکو پر کاروبار هم اغېز کړی او هغوی يې له ګڼو اقتصادي ستونزو سره مخ کړي دي.