2020-09-21
ښه راته ياد شو په اسمان کې چې سپوږمۍ تېريده
زه چې ماشوم وم نو اکثر به مې روپۍ تېريده
چې به راويښ شوم په څنګل کې به مې چغې کړلې
چې به ويده شوم په درياب کې به کشتۍ تېريده
د مصور دغه تصوير په ښار کې ډېر خرڅيده
لاندې کېږدۍ وه او د پاسه پرې مرغۍ تېريده
د زندګۍ په منځ کي بيا د مرګ پيغام خور شوی
د هديري په منځ کي بيا د چا ډولۍ تيريده
زما د سترګو نه به خلې راوته باقره!
زما په زړه کې به د چا د ياد څيلۍ تېريده