اختره اوس دې په لېمو ښکلوم
اوس دې جانان غوندې په زړه کې ساتم
اوس مې هېرېږې کله
ځکه چې ته راغلې جانان پخلا شو
ځکه چې ته راغلى جانان هم راغى
اوس به دعا درته په لپو کوم
اختره زه خو در نه ډېر خوښ يم
خو
نه پوهېږمه چې نور څنګه دي
اختره وايه کنه!
نور خو څه نه وايي چې ولې راغلې؟
تانه خفه خو نه دي؟
اختره وايه کنه!
څه وايي جامې نه لري؟
کنه،پلارجان يې مړدى مور يې مړه ده
خور يې مړه ده
اختره!
ورشه ورتر غاړې وځه
او ټول په خپله غېږ کې کلک ونيسه
اختره! وايه ورته
راځئ له غمه تېر شئ
له ډېر ماتمه تېر شئ
زه فقط درې برخې يم
چې له ډېر لرې نه راغلى يمه
ماهم په خپل ځان پورې کلک ونيسئ
ماهم له ځانه سره ځان کړئ
ماهم له ځان سره جانان کړئ
اختره!يوځل ورته داسې وايه
چې زه نور څوک نه لرم
که يې لرمه هغه تاسې ياست
چې په زړګې کې مې تل پاتي ياست
بختيار تلاش
د کوچني اختر دويمه ورځ